Бөлүмдөр
Шаршемби, 22-ноябрь
69.7    81.81    1.17    KZT 0.21
Талас

Айыл турмушу: Таластык Оморбековдордун үй-бүлөсү гүлдөрдүн 80ден ашык түрүн өстүрдү (фото)

Turmush -  Талас районундагы Беш-Таш айылында жашаган Токтогул Оморбеков менен жубайы Чынар Оморбекова чарбагында гүлдүн 80ден ашык түрүн өстүрүшөт. Жубайлардын ишмердүүлүгү менен аймактык кабарчы таанышты.

«Экөөбүздүн баш кошконубузга 44 жыл болду. Ошондо эле жубайым гүл өстүрүүгө абдан кызыкчу. Кышында көпчүлүк үйүбүздө бийик өскөн гүлдөргө суктанып кетишчү. Жаз айында көчөтүн тиккенден баштап жардам берип, жубайымдын айланага кооздук тартуулаган гүлдөрүн өстүрүүгө каралашам. Биз өстүргөн гүлдөрдүн эң сулуусу — «ночная красавица». Ал түнкүсүн гүл ачат. Чет мамлекеттерден алынып келген гүлдөр да бар», - деди 65 жаштагы Т.Оморбеков.

Чынар Оморбекова гүл өстүрүүнү кичине кезинен бери жакшы көрө турганын кошумчалады.

«Алгач үйдүн ичинде өсүүчү гүлдөрдүн түрүн өстүрчүмүн. Акыркы 10 жылдан бери короого түрдүү гүлдөрдү өстүрүп баштадым. Ал эми, гүлдөрдүн уруктарын Россиядан алдырабыз. Күн суукта уруктарды бир жолу колдонулуучу идиштерге сээп, үйдүн ичинде өстүрөм. Өсүп чыккан көчөттү жазында эшикке жөөк салып отургузабыз. Гүлдөрдү сатыкка чыгарбай, көбүнчө белекке беребиз. Өзүбүз кызыгып өстүргөнүбүз үчүн түйшүгү да билинбейт. Абышкам экөөбүз чарчаганда, кыйын учурларда гүлдөрүбүздү сугарып, тегерегин тазалап эс алып калабыз», - деди 63 жаштагы Ч.Оморбекова.

Былтыр аба ырайы жылуу болгондуктан гүлдөр жакшы өскөн.

«Чарбада гүлдүн 80 түрү бар болчу. Быйыл 1 жылдык гүлдүн санын азайтып, көп жылдык гүлдөрдү көбөйтүүнү чечтим. Учурда гүлдөрдүн 50дөн ашык түрү бар. Чакан аянтта роза гүлүн кесилген бутакчасынан өстүрүп жатам», - деп кошумчалады.

Жубайлар 2 уул, 5 кызды өстүрүп, жогорку билимдүү кылышкан.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Кароолор: 1874
Комментарии
Обсуждения закрыты
Көп окулду
Учурда окулуп жатат
×